| Message:
Continuation du marché entre Panurge et Dindenault
par M. François Rabelais, docteur en médecine et abstracteur de quinte essence
- (...) Patience! respondit Panurge, mais expedions.
- Et quand, dist le marchant, vous aurai je, nostre ami, mon voisin, dignement loué (de mes moutons) les membres internes? Les espaules, les esclanges, les gigotz, le haut costé, la poictrine, le foye, la ratelle, les trippes, la guogue, la vessie, dont on joue à la balle, les costelettes, dont on faict en Pygmion les beaulx petitz arcs pour tirer des noyaulx de cerises contre les Grues, la tête, dont, avecques un peu de soulphre on faict une mirificque decoction pour faire viander les chiens constippez du ventre?
- Bren, bren, dist le patron de la nauf au marchant, c'est trop icy barguigné! Vends luy si tu veulx; si tu ne le veulx, ne l'amuse plus.
- Je le veulx, respondit le marchant, pour l'amour de vous. Mais il en payera trois livres tournois de la piece, en choisissant.
- C'est beaucoup, dist Panurge. En nos pays j'en aurais bien cinq, voire six pour telle somme de deniers! Advisez que ce ne soit trop; vous n'estes pas le premier de ma cognoissance qui, trop toust voulant riche devenir et parvenir, est à l'envers tombé en paouvreté, voire quelque foys s'est rompu le col!
- Tes fortes fiebvres quartaines, dict le marchant, lourdaud sot que tu es! Par le digne veu de Charrous, le moindre de ces moutons vault quatre foys plus que le meilleur de ceulx que jadis les Coraxiens en Tuditanie, contrée d'Espaigne, vendoient un talent d'or la piece! Et que penses tu, ô sot à la grande paye, que valoit un talent d'or?
- Benoist monsieur, dist Panurge, vous vous eschauffez en votre harnois, à ce que je voy et cognois. Bien, tenez: voyez là nostre argent.
Panurge, ayant payé le marchant, choisit de tout le trouppeau un beau et grand mouton, et l'emportoit cryant et bellant, oyans tous les aultres et ensemblement bellans et regardans quelle part on menoit leur compaignon. Ce pendant, le marchant disoit à ses moutonniers: "O qu'il a bien sceu choisir, le challant! Il se y entend, le paillard! Vrayement, le bon vrayement, je le reservoys pour le seigneur de Cancale, comme bien cognoissant son naturel. Car, de sa nature, il est tout joyeulx et esbaudy quand il tient une espaule de mouton en main bien seante et advenente, comme une raquette gauschiere. Et, avecques un cousteau bien tranchant, Dieu sçait comment il s'escrime!
Comment Panurge fist en mer noyer le marchant et ses moutons
Soubdain, je ne sçay comment, le cas feut subtil, je ne eus le loysir le considerer: Panurge sans aultre chose dire, jette en pleine mer son mouton criant et bellent. Tous les aultres moutons, crians et bellans en pareille intonation, commencerent soy jecter et saulter en mer apres, à la file. La foulle estoit à qui premier y saulterait apres leur compaignon. Possible ne estoit les en guarder, comme vous sçavez etre du mouton le naturel, tousjours suyvre le premier, quelque part qu'il aille. Aussi le dict Aristoteles, lib. IX, de hist. animal., estre le plus sot et inepte animant du monde. Le marchant, tout effraye de ce que davant ses yeulx perir voyait et noyer ses moutons, s'efforçoit les empescher et retenir de tout son pouvoir, mais c'estoit en vain: tous à la file saultoient dedans la mer et perissoient.
Finablement, il en print un grand et fort par la toison sur le tillac de la nauf, cuydant ainsi le retenir et sauver le reste aussi consequemment. Le mouton fut si puissant qu'il emporta en mer avecques soy le marchant et feut noyé, en pareille forme que les moutons de Polyphemus , le borgne Cyclope, emporterent hors de la caverne Ulyxes et ses compaignons. Autant en feirent les aultres bergiers et moutonniers, les prenans uns par les cornes, aultres par les jambes, aultres par la toison, lesquels tous furent pareillement en mer portez et noyez miserablement.
Panurge, a cousté du fourgon, tenant un aviron en main, non pour ayder les moutonniers mais pour les en guarder de grimper sur la nauf et evader le naufraige, les preschoit eloquentement, comme si feust un petit frere Olivier Maillard ou un second frere Jan Bourgeoys, leur remonstrant par lieux de rethoricque les miseres de ce monde, le bien et l'heur de l'aultre vie, affermant plus heureux estre les trespassez que les vivans en cette vallee de misere et à chascun d'entre eulx promettant eriger un beau cenotaphe et sepulchre honoraire au plus hault du Mont Cenis, à son retour de Lanternoys; leur optant ce neantmoins, en cas que vivre encores entre les humains ne leur faschast et noyer ainsi ne leur vint à propous, bonne aventure et rencontre de quelque baleine, laquelle au tiers jour subsequent les rendist sains et saulves en quelque pays de satin, à l'exemple de Jonas.
La nauf vuidee du marchant et des moutons:
"Reste il icy, dist Panurge, ulle ame moutonniere?"
Rabelais, extrait, Quart livre des faicts et dicts heroiques du noble Pantagruel |
Forum 
